ضي ولادنا وبلبل بكره...

بسم الله الرحمن الرحيم
هذه قصيدة عن مصر وتونس من تأليف الوالد:
ضي ولا دنا وبلبل بكره......

مهمــــا تطبطـــب أو تديله
عمر الكلب مايعـــــدل ديله
حتمن لازم أحـــــرق نفسي!
علشــــان حق اخويا يجيله؟
كل مافكر في اللي جراله
واللي هيجرا واللي جاريله
أنا يااخواتي خلاص هتجنن
حــد يقولـــي وانا هادعيله
عشت امبارح أملي ف بكره
جايــــز بكره تقيد قناديله
راح امبارح ولاجاش بكره
صوتي اتبـــح وأنا بناديله
امتى يافجر علينا تشقشق ؟
تاخد ظــلم الضلمه وويله
تونس لما اتلســـوع واحد
هــــر رئيسها وفــر بديله
أما لواحنا النص اتحروق
هنعـــيش نهتف ونغنيله
شعب وفاؤه اتخطى حدوده
مهما يكون فالــرمز دليله
فرعون منا وعايش فينــا
لو غار واحـــد ألف بديله
انـــا مش بائس ولامتهني
ولاحيران ضاع منه سبيله
ولاواحد مشغول أو فاضي
ولاشايف فين بكرا اجريله
ولاخايف ولابرضه مآمن
ولاعاشق ولاقلبه فاضيله
أنا ذل الحيره وقساوتها
أنا هارب من سُبه ف جيله
انا مستني البلبل يصدح
ويرفرف وتعود مواويله
فينا الحل في ضي ولادنا
يمحي عذاب االظلم ويزيله
بيهم فجر أخويا يشقشق
أو نرتاح م الندل وديله

صديقكم: عبدالرحمن الصديق العرمان

بارك الله لك في والدك ونتطلع للمزيد.....

جميل جدا يابودي ربنا يبارك في والدك الكريم